LA PROPHECIE du Roi CHARLES VIII
Et puis elle, par son moyen,
Au roy Alfonso d'Aragon
Fist entendre qu'il estoit sien
Et ly porta en sa maison.
Le roy le print ou sien ou non.
Si vous diray, sans point de fables,
Comment et [de] quelle façon
II le fist après roy de Naples.
II est notoire que le bon roy René,
Estant tousiours roy de Cécile,
En la Cécille avoit ordonné.
Tant au royaume que en l'Isle;
Par le pays en chesque ville,
Françoys il mist en garnison,
Lesquelz furent à mort très vile
Mys, et par grande traïson.
Premier, en l'isle de Cécille
Devez savoir que les Françoys,
De nostre coustume et stille,
Furent aux dames fort courtoys; |
Mais Céciliens, l'an deux foys,
Leurs femmes point ne cognoissent
Pour leur péchié souventes foys,
Dont leurs femmes trop angoissent
Par toute l'isle que tant que dure
Le jour de Pasques, soyez seur,
Tout en ung jour et en une heure
Dans l'esglise fut le malheur;
Françoys recepvant leur sauveur
Tous agenoullez par esgaulté,
Ces Céciliens plains d'ordure
Les tuarent par grant cruaulté.
Du pape furent ilz mauldiz
De maldiction éternelle,
Pource qu'en l'esglise meurtriz
Les avoient par façon telle ;
Puis pour argent et par cautelle
Furent absoulz, o pénitence
Qu'ilz portent deul, noire gonnelle,
Pour la mort de ceulx là de France.
Et puis cest ysle au roy d'Espaigne
Se donna; sienne fut depuis,
Affin que l'on ne les regaigne,
Et pour peur d'en estre punis.
Veyrent le roy René petis,
Foible d'armes et d'ordonnance.
Villains leur seigneur, je le dis,
Priver du droit n'ont pas puissance.
Napolitains semblablement
Leurs autres Françoys à oultrance
Tuer vouloit, mais vrayement
Ce ne fut pas bien en leur science.
Car les Françoys, sans nul dobtance,
Qui là furent en garnison,
Bien adviséz par providence,
Les tenoient en subgection.
Mais soubz la main, secrètement,
Mandarent au roy d'Aragon
Qu'il vint à Naples puissamment;
Et de Naples ly firent don.
Ainsi fut René, le roy bon,
Et le duc Jehan qu'estoit son filz,
De Naples par leur trayson
Chassez dàhors et expellis. |
Le roy d'Aragon donna Naples
A Ferrando, son filz bastard,
Lequel ne fut pas roy mais diables.
Qui leur faisoit bien à la part,
Puis dirent: « Le diable y ait part,
« Quant chassasmes le roy si bon,
« Bon temps avions matin et tard;
« Si mal avons, c'est bien raison. "
Son filz Alfonso, borgne, louche,
Filz de Marran et de Marrane,
Ces Napolitains il vous touche
Et charge coups com à ung asne.
J'ay veu la gent napolitane,
Que pour appeller ung Marran
Estoit pendu à la doane
En la faveur du Cathalan.
Or ay je veu Napolitains
Crier à Dieu, à haulte voix,
Tant qu'ilz peuvent, à jointes mains :
« Dieu, envoyez-nous ces Francoys !
« O mon Dieu, qu'il y a grant choix,
« Nous cognoissons bien noz erreurs ;
« Ces bons Françoys doulx et courtoys,
« Si sont noz naturelz seigneurs. »
Cy les prins à réconforter :
« N'ayez en ce nulle doubtance
« Que Dieu fera cy transporter
« Charles le noble roy de France.
« II est duc d'Anjou, de Prouvence
« II est conte certainement ;
« Et si a bien autre puissance
« Que le roy René vrayement. »
Quant j'euz ce dit, respondirent
Napolitains par grant souspir :
Hélas! hélas! et puis dirent :
« Dieu éternel vous vueille ouyr ;
« Qui duc d'Anjou est sans faillir,
« Et de Prouvence conte soit;
« Jhérusalem ly doit venir
« Et roy de Cécille estre doit.» |
